Delhi restaurant fire ki ye ghatna northeast Delhi ke Maujpur ilake ki hai. मंगलवार रात करीब 10:34 बजे Main Jafrabad Road par sthit Udham Fish Point restaurant me aag lag gayi. Aag restaurant ki ground floor ki rasoi se shuru hui. Kuch hi minute me chaar manjila imarat lapton me ghir gayi.
Iske baad jo hua, uske video ab social media par viral ho rahe hain. Pehli manjil ki khidki se ek bachche ko neeche phenka gaya. Neeche khade logon ne use haathon me pakad liya aur surakshit jagah le gaye. Bachche ke saath hi 10 se zyada log — mard aur aurat dono — khidkiyon se kudne lage. Ek mahila paas ki imarat ki chhat par kudi. Dusre video me mahilayen aur bachche chhat se utarte dikhai diye.
Is dauraan sthaniya log madad ke liye daud pade. Logon ne pehli manjil se kudne walon ko chot se bachane ke liye chadaren aur gadde bichha diye. Ek sthaniya nivasi ne news agency ko bataya ki aag lagne ke turant baad lapte poori imarat me fail gayin. Isse andar maujood logon me ghabrahat mach gayi.
Rahat ki baat ye rahi ki is hadse me koi ghayal nahi hua. Restaurant ke karmchariyon ne aag ko failne se pehle bujha diya. Fire tender bhi mauke par pahuncha. Delhi Police ke anusaar ye ilaka Welcome police station ki seema me aata hai. Police ne kaha hai ki aage ki jaanch jaari hai.
Delhi Restaurant Fire: Ab Hogi Sakht Karwai
Ghatna ke baad fire safety par sawal uthne lage hain. Shahdara North Zone ke Chairperson Pankaj Luthra ne ilake ke un restaurants par turant karwai ke aadesh diye hain jo niyamon ka ullanghan karke chal rahe hain. Unhone kaha ki aisi ghatnaon ko halke me nahi liya ja sakta.
Luthra ne nirdesh diya hai ki nirdharit niyamon aur safety mankon ka palan na karne wale restaurants ki jaanch ki jaye. Niyam todne wale pratishthanon par kanoon ke tahat karwai hogi. Unhone kaha ki surakshit nikasi ka rasta na hona ek chhoti ghatna ko bade hadse me badal sakta hai. Kisi bhi star par laparwahi bardasht nahi ki jayegi.
